Регионы

Цёплы дождж над Глускам

Сацыяльная сфера – прыярытэт у глыбiнцы

Калi я прыехаў у Глуск, накрапваў цёплы дожджык. Не раскрываючы парасон, я   крочыў ад аўтавакзала па цэнтральнай вулiцы i любаваўся аблiччам гарадка. 

Мiжволi падумаў: адбылася “культурная рэвалюцыя” — выкарчавалi старыя   дрэвы i замянiлi iх маладымi. Ад гэтага стала прасторней, святлей.   Папрыгажэлi фасады райаддзела мiлiцыi, дома сувязi, з’явiлiся клумбы   кветак. Заўважыў i навiнку – фантан, якi “пырскапеў”, прываблiваючы дзяцей   i дарослых. Многiя скiроўвалi на рынак “Глускi прывоз”, што ўдала ўпiсаўся   памiж кiнатэатрам “Арыён” i “Унiверсамам”. З цiкавасцю агледзеў Алею   Славы, дзе нядаўна з’явiўся бюст двойчы Героя Савецкага Саюза танкiста   Шутава, затрымаўся каля барэльефа вядомага беларускага паэта Сяргея   Грахоўскага. Малайцы, памятаюць пра славутых землякоў, называюць iх   iмёнамi вулiцы i бульвары. А яшчэ мне спадабалiся фiгуры старажытных   воiнаў, звяроў, птушак, выразаныя адмысловым мясцовым майстрам на ствалах   старых дрэў.   

Пабачыў я i самую “крутую” вытворчасць гарадка – цэх замарозкi ягад i   грыбоў, што размешчаны на тэрыторыi раённай нарыхтоўчай канторы. Уведзены   ў строй ён у мiнулым годзе. Будаваўся год. Здалi аб’ект своечасова,   абсталяванне ўстанавiлi шведскае i iтальянскае. Вялiкiя халадзiльнiкi,   свая лабараторыя, усялякiя бытавыя памяшканнi — не цэх, а буйная   вытворчасць. 

“Якраз гэта нам патрэбна, — гаварылi глушчане. – Цяпер можна да мiнiмуму   скарацiць беспрацоўе, стварыць новыя рабочыя месцы”. 

У раёне ўжо спрабуюць вырошчваць клубнiцы на большых плошчах, у лясгасе   вядуць нарыхтоўку чарнаплоднай рабiны. I калi летась перапрацавалi 600 тон   ягад i грыбоў, то сёлета плануюць мiнiмум на трэць павялiчыць аб’ёмы. 

Жаданне ёсць, магчымасцi таксама, ды i вопыт многае значыць. Гаворка iдзе   не толькi пра вытворчасць, але i маркетынгавую палiтыку па частцы   заключэння кантрактаў на пастаўку сыравiнных матэрыялаў, пашырэнне   нарыхтовак. Сёлета пасля ўстаноўкi адпаведнага абсталявання плануецца   пачаць замарозку бульбы i гароднiны. Выпрацоўка – дзве тоны ў гадзiну, у   дзень – 18—20. 

“Глусское лукошко” – такую назву атрымала фасаваная прадукцыя цэха –   паступае ў гандлёвую сетку рэспублiкi i iдзе за мяжу. Так што перспектывы   спрыяльныя. 

А потым я прысутнiчаў на нарадзе кiраўнiкоў гаспадарак у райвыканкаме з   удзелам кiраўнiка раённай “вертыкалi” Аляксандра Багеля. Вырашалiся   пытаннi корманарыхтоўкi i надыходзячай жнiўнай пары. 

Мiкалай ДАВIДОВIЧ, «Р»

“РЭСПУБЛIКА” № 142 4.08.2009

http://respublika.info/4808/region/article32946/